Vatanimiz mustaqilligining 17 yilligi arafasida turli davlatlarning
taniqli siyosat va jamoat arboblari, olim va san'atkoralari xalqimizni
yaqinlashib kelayotgan ushbu qutlug' bayram bilan tabriklamoqda.
Ulardan biri Markaziy Osiyo bo'yicha Kembridj forumi raisi, Buyuk
Britaniyaning Markaziy Osiyo mintaqasi bo'yicha yetakchi ekspertlaridan
biri, doktor Sidxart Saksenadir.
- O'zbekiston
mustaqilligining 17 yilligi asnosida mamlakatda amalga oshirilayotgan
ijtimoiy-iqtisodiy islohotlarning mohiyati, yo'nalishlari va
natijalarini idrok etish muhim, - deya ta'kidlaydi olim. – Bu xususda
gapirib, avvalo, O'zbekistondagi tub o'zgarishlar xalq tarixi,
madaniyati va dunyoqarashini hisobga olgan holda amalga
oshirilayotganini qayd etish lozim. Ayrim mamlakatlar asosiy e'tiborni
iqtisodiy rivojlanishga qaratib, madaniyat, ma'rifat va ma'naviyatni
diqqatdan chetda qoldirayotgan bir paytda sizning yurtingizdagi
taraqqiyot jarayoni jamiyat hayotining barcha jabhalarini, xususan,
iqtisodiy taraqqiyot, ta'lim, sog'liqni saqlash, ma'rifat va
ma'naviyat, yosh avlodni tarbiyalash kabi muhim sohalarni qamrab
olmoqda.
Mendan ko'pincha, fuqarolik jamiyatini
rivojlantirishning dunyodagi barcha xalqlarga nisbatan tatbiq etish
mumkin bo'lgan "universal modeli"ning bor yoki yo'qligi haqida
so'rashadi. Bu savolga men hamisha davlat va jamiyat munosabatlarini
bir model doirasida ushlab turadigan taraqqiyotning yagona yo'li yo'q,
deb javob beraman. Davlat va jamiyat o'rtasidagi munosabatlar xususida
gap ketganda, fuqarolik jamiyati Osiyo mamlakatlari uchun tarixan xos
bo'lgan xususiyat ekanini aytish o'rinli bo'ladi. O'zbekiston bu
ro'yxatda o'zining munosib o'rniga ega, binobarin, mamlakatda fuqarolik
jamiyatining beqiyos va ijobiy modeli yaratilgan bo'lib, u azal-azaldan
jamiyat hayotining ajralmas bir bo'lagi bo'lib kelgan.
Fuqarolik jamiyatining samaradorligini tahlil qilar ekanmiz, undagi
mavjud institutlar qandaydir xorijiy "model"larga to'g'ri
kelish-kelmasligiga emas, balki oddiy insonlarning talab va
ehtiyojlarini qanchalik qanoatlantirayotganiga e'tibor qaratishimiz
lozim.
O'zbekistonda har yilni jamiyat hayotining ma'lum bir
jabhasiga bag'ishlash yaxshi an'ana tusini olgan. Jumladan, 2008 yil
yurtingizda "Yoshlar yili" deb e'lon qilindi. Bu xususda gapirib,
avvalo, mazkur tashabbus o'tgan yillardagi ijtimoiy dasturlarning muhim
rejalari bilan mantiqan bog'liq ekanini ta'kidlash lozim. Yoshlar har
bir davlatning taraqqiyotida muhim o'rinlardan birini egallashi sir
emas. O'zbekistonda buni yaxshi anglagan holda masalaning ikki
jihatiga, ya'ni ta'lim va sog'liqni saqlash tizimlarini
takomillashtirishga alohida e'tibor qaratilmoqda. Yurtingizdagi ta'lim
darajasi juda yuqori. Men bu sohani alohida qiziqish bilan tadqiq
qilib, ta'lim tizimidagi islohotlar o'zining ijobiy samarasini
berayotganiga ishonch hosil qildim.
Sog'liqni saqlash
tizimiga to'xtalib, O'zbekistonda onalar va bolalar salomatligini
muhofaza qilishga va, umuman, yosh avlodning sog'lom o'sib-ulg'ayishiga
alohida ahamiyat qaratib kelinayotganini ta'kidlashni istardim. Buning
uchun yurtingizda bola rivojining barcha bosqichlarida uning
sog'lig'ini nazorat qilib borish imkonini beruvchi samarali tizim
yaratildi.
Tez orada O'zbekiston mustaqillikning 17 yilligini
keng nishonlaydi. Mustaqillik – bu ulug' ne'mat. Uni nafaqat tantana
bilan bayram qilish, balki qadrlay bilish ham kerak. O'zbekistondan bu
borada o'rnak olsa arziydi. Xalqingiz faxrlanishi mumkin bo'lgan yutuq
va natijalar talaygina. Ammo ularning eng asosiysi va eng qadrlisi -
mustaqillik yillarida mamlakatda hukm surayotgan tinchlik va
barqarorlikdir. Ishonchim komil, O'zbekiston taraqqiyot va ravnaq
yo'lidan bundan keyin ham dadil olimlashda davom etib, o'z oldiga
qo'ygan barcha ezgu maqsadlarga albatta erishadi!
